കൊടകര പുരാണം പുസ്തകമാകുമ്പോള്‍....

പ്രിയപ്പെട്ടവരേ,

അങ്ങിനെ കൊടകര പുരാണം ‍ പുസ്തകമായി ഇറങ്ങാന്‍ പോകുന്നു.

പക്ഷെ, കൊടകരയിലെ വൈകുന്നേരങ്ങളില്‍ ‍ ഗ്രൌണ്ടിലും തോട്ടുവരമ്പത്തും ശാന്തി ഹോസ്പിറ്റലിന്റെ മതിലിന്മേലുമിരുന്ന് ഞാന്‍ ചുമ്മാ നേരമ്പോക്കിന് കൂട്ടുകാരുമായി പറഞ്ഞ് ചിരിച്ച കഥകള്‍ ഓര്‍ത്തെടുത്ത് ലഞ്ച് ബ്രേക്കിനും ഓഫീസില്‍ ബോസില്ലാത്ത സമയത്തും ബ്ലോഗിലെഴുതിയ ആ കര്‍മ്മത്തിന്റെ, അള്‍ട്ടിമേയ്റ്റ് ഡെസ്റ്റിനി ഇതാണ് എന്ന് ഞാന്‍ കരുതുന്നില്ല.

അത് പുസ്തകമായാലും ഇല്ലെങ്കിലും അതിനേക്കാളും പതിന്മടങ്ങ് സന്തോഷം തോന്നുന്ന കാര്യം, നിങ്ങളെപ്പോലെയുള്ള ഒരുപാട് പുലികളെ സുഹൃത്തുകളായി എനിക്ക് കിട്ടി എന്നതാണ്. സത്യം.

ഒരു പുസ്തകമായി ഇറങ്ങുമ്പോള്‍ അതുവഴി എനിക്ക് കിട്ടിയേക്കാവുന്ന എന്തിനേക്കാളും ഏതിനേക്കാളും വലുതായി ബൂലോഗത്തിലെ നമ്മുടെ സൌഹൃദത്തെ ഞാന്‍ കാണുന്നു.

പുരാണങ്ങള്‍ പുസ്തക രൂപത്തിലെത്തുവാന്‍ വേണ്ടി ഞാന്‍ ചെയ്ത മഹാ കാര്യങ്ങള്‍ എന്താണെന്ന് കൂടെ ഒന്ന് പറഞ്ഞേക്കാം.

* ഇതൊക്കെ എഴുതി ബ്ലോഗില്‍ പോസ്റ്റ് ചെയ്തു.
*ചുമ്മാ ഒരു ദിവസം തൃശ്ശൂര്‍ കറന്റ് ബുക്സില്‍ പോയി എഗ്രീമെന്റില്‍ ഒപ്പിട്ടുകൊടുത്തു.

പക്ഷെ, ഞാന്‍ ചെയ്ത ഈ രണ്ടുകാര്യങ്ങള്‍ക്കുമിടയില്‍; അപ്രശസ്തനായ ഒരാളുടെ കുറിപ്പുകള്‍ കറന്റ് ബുക്സ് പോലുള്ള ഒരു നല്ല പബ്ലിഷറെ കൊണ്ട് ഇറക്കിപ്പിക്കുവാനായി പെടാപ്പാട് കഴിച്ച കുറച്ച് പേരുണ്ടീ ബൂലോഗത്ത്. പുരാണം പുസ്തകമാവുന്നെങ്കില്‍ അതിന്റെ എല്ലാ ക്രെഡിറ്റും അവര്‍ക്കവകാശപ്പെട്ടതാകുന്നു.

അവരോടെനിക്കുള്ള കടപ്പാട് പ്രകടിപ്പിക്കാനുള്ള വാക്ക് മലയാളത്തില്‍ ഇല്ല, അല്ലെങ്കില്‍ എനിക്കറിയില്ല!

പുസ്തകം ചിലവായാലും ഇല്ലെങ്കിലും, വായിക്കാന്‍ ആളുള്ളിടത്തോളം, എനിക്കീ ജോലിയുള്ളിടത്തോളം, കൊടകരയുടെയും കൊടകരക്കാരുടെയും വിശേഷങ്ങളുമായി ബൂലോഗത്ത് പുതിയ കൊടകര പുരാണങ്ങള്‍ മുടക്കമില്ലാതെ വന്നുകൊണ്ടിരിക്കും.

നിങ്ങളെല്ലാവര്‍ക്കും ഒരിക്കല്‍ കൂടി എന്റെ നമസ്കാരം.